ភ្នំពេញ៖ អ្នកតំណាងក្រុមហ៊ុន Veritas & Mercurius Publishing ដែលជាសមាជិក របស់ Pheonix Publishing & Media Group នៃសាធារណរដ្ឋប្រជាមានិតចិន លោកស្រី Xu Qing Zhu បានបង្ហាញពីគម្រោងចង់ធ្វើកិច្ចសហការជាមួយក្រសួងព័ត៌មានលើការងារបោះពុម្ពផ្សាយសៀវភៅពាក់ព័ន្ធវប្បធម៌ប្រពៃណីនៃប្រទេសកម្ពុជា-ចិន។

ក្នុងជំនួបជាមួយរដ្ឋមន្ត្រីក្រសួងព័ត៌មានលោក នាព្រឹកថ្ងៃទី៩ ខែធ្នូ ឆ្នាំ២០២១នេះ លោកស្រី Xu Qing Zhu បានឱ្យដឹងថា ក្រោមគំនិតផ្តួចផ្តើម “ផ្លូវ១ ខ្សែក្រវ៉ាត់១” របស់រដ្ឋាភិបាលចិន ក្រុមហ៊ុនមានការគាំទ្រលើសកម្មភាពទំនាក់ទំនង វប្បធម៌អន្តរជាតិ និងការបោះពុម្ពផ្សាយ។ លោកស្រីបានជម្រាបជូនរដ្ឋមន្រ្ដី ខៀវ កាញារីទ្ធ ថាក្រុមហ៊ុនលោកស្រីមានគោលបំណងចង់សហប្រតិបត្តិការជាមួយក្រសួងព័ត៌មានកម្ពុជា និងការដាក់ឱ្យដំណើរការ “គម្រោងកម្ពុជា-ចិន” លើការបកប្រែនិងការផ្សព្វផ្សាយស្នាដៃបុរាណនិងសំខាន់។

លោកស្រីបន្ថែមថា គម្រោងនេះជាការរៀបរៀងនិងបោះពុម្ពសៀវភៅ  ឬឯកសាររវាងប្រទេសចិននិងកម្ពុជា ដើម្បីពិភាក្សាពីភាពដែលអាចធ្វើទៅបាននៃគម្រោងសហការ។

ជាការឆ្លើយតបលោករដ្ឋមន្ត្រី ខៀវ កាញារីទ្ធ បានគាំទ្រចំពោះគម្រោងនេះនឹងបានឱ្យក្រុមការងារបច្ចេកទេសធ្វើកិច្ចសហការជាមួយតំណាងក្រុមហ៊ុនរបស់ចិនពិនិត្យលើការងារលម្អិតមួយចំនួន ដើម្បីដាក់ជូនទៅស្ថានទូតចិនប្រចាំកម្ពុជាធ្វើការពិនិត្យបន្តសម្រេចលើកិច្ចសហការគ្នាឈានទៅធ្វើការអនុវត្តគម្រោងរួមគ្នាក្នុងពេលខាងមុខ៕

^{PHOTO: AKP}